Sérstaða leikskólans Bakkakots felst í ríkri áherslu á útinám, náttúru og virka tengingu við nærumhverfið. Náttúran er órjúfanlegur hluti af daglegu starfi og er nýtt sem vettvangur til náms, leiks og uppgötvana í gegnum allar árstíðir.
Leikskólinn nýtur einstakrar staðsetningar í nálægð við fjöru þar sem börnin fá tækifæri til að kanna umhverfið, fylgjast með dýralífi og upplifa náttúruna af eigin raun. Þar vaknar forvitni, virðing fyrir náttúrunni eflist og börnin læra af beinni reynslu.
Stóri leikskólagarðurinn okkar er einnig mikilvægur hluti af sérstöðunni. Þar er að finna lítinn skóg sem elsta deildin kaus að nefna „Ævintýraskóg“ með lýðræðislegri kosningu. Skógurinn er lifandi leik- og námsrými þar sem börnin klifra í trjám, skapa eigin leiki og nýta opinn efnivið á fjölbreyttan og skapandi hátt.
Í Ævintýraskógi „elda“ börnin í náttúrunni með því að nota plöntur, steina og mold, og hugmyndaflugið fær að njóta sín án takmarkana. Þar skapast rými fyrir sjálfstæði, samvinnu og ímyndunarafl þar sem leikurinn leiðir áfram nám og upplifun.
Með útinámi, náttúruupplifun og skapandi leik viljum við efla forvitni barna, styrkja tengsl þeirra við umhverfið og gefa þeim tækifæri til að læra með hjarta, hug og höndum.
